Lawas Dita Satu

Ngibar pio layang dua (laki)
Tarepa jendring uma ta
Bau ke pendi ruana

Ajan yapendi iyasi
Yakananta batepangmo
Tunonda lako pina ne

Kadatang sangka kualu (perempuan)
Mole kusampango kemang
Lema mampis bawa rungan

Kele mampis bawa Rungan
Na sepanku jorong roa
Kurahmat kadatang sia


Pio leng gili do ana (laki)
Dengan to sanyaman ate
Mana barat kulayarsi

Pitu ten kulayar barat
Haram untungku lako len
Le lema andi kuasa

Tutu ke sanak salaki (perempuan)
Yamulayar bangka kaku
Sia tama ke nyomo ling

Kutokal timpalaja
Datang pio seyap aku
Ala parasaku sia

Do adi laga mumikir (laki)
Tara mentu mengas desa
Ungkap nomonda kalako

Sanenge sanak salaki (perempuan)
Ta mentu kulayang kemang
No urung sia yasumping

Baringin leng dalam bulan (laki)
Les ulir keal leng bintang
Na gama putis pangarap

Cece we careme belo (perempuan)
Ijo godong beko kemang
Na’ bonga lamin sayate

Lamin ning rasate ate (laki)
Sia gama beme rara
Peno tu len no kurela

Dapat tampar joge bungin (perempuan)
Beling gong genang kutangis
Ning bao bangka ke sia

Lawas Dua

Do intan bau gamana
Yapili aku leng sia
Mampis lalo bawa rungan

Rungan sia dalam geda
Aku ai dalam kaca
Senap tusaling panjele

Tupanjele santung sia
Na kalupa balik bungkak
Totang kajangi tugama

Sai ingat dua takit
Empat tangar balong paham
Ling dalam sia ling aku

Pantassi mana tupili
Rengang tusaling sarapat
Jangka umir tugamana

Yakuleno tu do mata
Masi ke notang ruana
Lamin angan pola biasa
Lesmo diri ai mata

Lamin kuanganmo sia
Ai mata tendri diri
Men kuangan pola biasa

Boat kita leng donia
Nonda mana na katili
Ne ima dadi saksi

Ke apa keang kubalas
Ke bulan kane no selam
Selam bulan ke ai mata

Lawas

Nginingsi parana sia
Onang mara baso tembu
Tiup leng angin riam den

Batamo riam tutokal
Sabue ragi panangar
No nesal mudi tutingi

Batopo sia beling man
Sarema tubu ke nyawa
Rarang ate no badua
Samung leng anak tungining
Rop kayu pendamsi mata
Tutingi keme yapola

Kane aku tau tingi
Me ode ngining kukelek
No kubeang melasakan

Sate yakugita sia
Tokal pang mega rampi mpat
E rembin lema kaseang

Sakit lampa nonda ina
Kumara rembin kaseang
Kudadi mega ta ngantung

Kane mara kupina ne
Kungantung mikirpo dunung
Yajangi menta kuseseng

Kakuojongsi parana
Tendris no kubeang basa
Ujan tampear kukeme

Sate yakugita ina
Kutokal dua ke leno
Nan pang tendri ai mata


Lawas

Ajan sapendi iyasi
Sakananta batepangmo
Nanta tungining maraku

Balangan bijan tutingi
Riam mara rembong bulu
Intan no bilen leng rame

Rame paladang tutingi
Siong rame leng tamue
Rame leng anak tungining

Melasakansi ne peno ta
Adasi lako pina ne
Pang aku nonda balalo

Ning bao gili nantaku
Kutokal dua ke leno
Jangiku tampo leng umak

Donia mara den maman
Kupanjele sajan mampis
Loba le jangi kugama

Nanta aku sijar jangi
Nomonda boa no beling
Sabar kanga we bagian

Datang bagian ko aku
Ai mata tenri diri
Parana tetap kungining

Kutokal leng jenring sabar
Kalenge sajan no datang
Saipo kawa sampe su

Su ate sia sabuang
Katendu kaku no sia to
Siong let lema barumak


Lawas

Kutulang do samin gili
Kurabalik riam bako
Do nanta tunonda sanak

Nanta sanaktu pang aku
Mara kukasena no rasa
Tulang kungining liseno

Aku koa ku lo nesal
Bendrang sate yakulempat
No jukung kalong kulanting

Lamin leng rasate ate
Liang sopo kuganua
Lema no rugi mesan mpat

Kutokal rop pancar puti
Senapmo katoan rungan
Kaselir anak tungining

Penomo rapang tugita
Tuselis ling nonda sanga
Intan ning tutu kadua no

Sosong lalo we tutingi
Mara santek no galigir
Tulang kungining liseno

Nomonda sakit rea mal
Sate yakutengke tingi
Mara tulalo lempat lit

Mana sakeme kuseseng
Jangi suda kutarima
Sapuan lagi no mungkir

Na jina kendras umak lit
Yatampo rara kaku
Pendi tungining nantaku

Lawas

Ai mata jangi tenri
Kusentek langan pakendek
Aku no kubeang susa

Mana sakeme kususa
Kukatawa gama dunung
Kupanto palangan jangi

Saribu ten le kususa
Saling sawal ke kasakit
Nopoda hukum sanompo

Mulia desa surga
Nomonda anung tubuya
Saragi jenis kanyaman

Sesal dosa kamuboat
Na ke angan murabalik
Muntu ajal nopo datang

Karana jangi ta intan
Bakemang mara kayu long
Rarang nyonde no yasumping

Kaneku to menta jangi
Kulo serek mara jontal
Lema na sanantang ila

Gila e parana kaku
Mara lalede jendring lit
Ntek turin tampo leng umak

Umak rea leng balusin
Tampo tau sala-sala
Rapang pamendi no tutu

Bagita nonda katili
Mupakat telit leng manik
Ramenong susa no kurang

Lawas

Bua kusamanta kau
Leng sopo sipat ke sato
Bakal bau beme rara

Mana leng satoe gili
Kusalomesi ke sampan
Kenras umak no kumiring
Mamo panto tu tutu ling
Tanyak mara layar turin
Baka ke miring mugita

Cece we menir laboran
Lis kemang dadi rasa
Kabekas ate nonda su

Mana pitu rampi olat
Nempas manasi kunulang
Santung ke parana kau

Kane sopo pang tutokal
Tubausi gita yandi
No kenre leno masa no

Parana kau ai lit
Aku dadi umak sisi
Nosoda masa no rentung

Rentung umak tano intan
Nosi lagi tusanyata
Beang kupendi liseno

Lamin galak kusaleno
Nosoda nyonde man rela
Mudi ling dunung katawa
Tukemas muka nan datang

Lamin andi dunung mate
Aku dadi kenre puti
Lema tuburuk barema

Lawas

Mara punti gama ina
Den kuning no tenri tana
Mate bakolar ke lolo

Balong tau no mugegan
Lenge sempu no gantuna
Denganmu barema ngining

Na ke asimu samogang
Paboat aji ko nene
Lema salamat parana

Kalalo tua balobo
Deparmo ne kubalangan
Nomonda susa intan e

Leng tenga lit nyata leno
Leng tampat nonda kugita
Ala e merua pang nyata

Yasabuya nyata kaku
Siong rentung mara umak
Kenras mara ai turin

Kalalo arus rang subu
Lengat marapo sabasang
Ai nyer ijo no sama

Peno sama tingi sia
Kapo rampak boa beling
Royo tungining maraku

Lengas mara dalam meja
Kapo tempu ning kapangan
Goyomo parana kaku

Lengas sai kadatang ba
Kapo nongka long balong
Goyo ate rena mikir

Ngibar pio les matano
Tarepa kayu empat den
Ahmad buya muhammad

Ada bangka kusamodeng
Kusangisi kotak mesir
Yatimal umak rampek ban

Lamin salamatmo nyawa
Kemasmo bilen donia
Goyo ampo ko aherat

Mana peno amal tenrang
Namo angan tamo kena
Nansi ujub gaok diri