Senin, Agustus 17, 2009

Lawas Dita Dua

Gila nanta batang tubu
Liuk ning kalamu tana
Bonga bao lo langit ba

Dapat lenang padang mahsyar
Datang panas nonda jangka
Mepo amal yakarana


Yatubuya datang amal
Pasuru nongka tuboat
Iman jolo ko neraka

Barengo isi neraka
Parak tau nonda samung
Nyawa kasasar gila e

Sai sate nyaman mate
Lagamo boat sembayang
Lema nyaman nyawa lalo

Nyawa lalo bilen tubu
Renduk nagis leng poto ban
Masipo asi donia

Donia mara den maman
Kupanjele sajan nyaman
Loba ke umirku gama

Na mudi nyengok we bangka
Sadia momatmo dunung
Lema no balabu boro

Odesi batang parana
Nongka pakendek ling bola
Nonda nyir lamin karante

Nosoda lamin pang aku
Batau katau kantopmo
Kuingat adi kagisir

Tetu ke kaka benra ke
Yasakemban rara kaku
Bano ke dadi sanaseal

Kuda bua yakunesal
Ta boat ada kugita
Parana puji ling ate

Ajanku bada ruate
Lipat dua sampar beru
Nopoda dacing tutimang

No kusadu sia beling man
Siong tutu tutit untung
Satenga gantang rasate

Sai kasarungan kau
Aku koa loba dua
Nyata bagompol mara nyir

Parana tenreng salolo
Tembok roa sikit roa
Meling kakasi kuturit

Beling guntir awal subu
Haram kukalupa adi
Kumenta belo rarate

Kemamo belo rarate
Kutunung no pendam mata
Katotang pola biasa

Kabiasaku ke sia
Nonda kugita sangano
Sabulan tangkas rarate

Balong ruamu pe ari
Mara bulan buntar subu
Yasasenap ate kita

Buin ate orong bua
Yajarup leng nyinde do desa
Bonga mayang totang untung

Mana mulalo lempat lit
Lamin nan pang tenri untung
Taro lebal tendri jangi

Benru dapat sompo jangi
Pade samawa nungal wang
Maris gama no kagasung

Kagasung mara rembu bes
Bolang lonto tali seno
Leng no putirs ta nosoda

Nosoda sama nan maras
Mara tusaling do ate
Do tokal tusaling totang

Do tokal samaras oles
Kujambalang karante
Seling ko parana yandi

Parana kaku ta yandi
Batiup mara angin subu
Nomonda masa no renas

Renas angin leng katokal
Tenri ko tana salingong
Lonto dadi tali jati

Long lolo jati dalam
Puen balemar ke ai
Senap sangka kupanjele

Kupanjele sawo kampung
Rep mara tutendung sako
Kamanis na gama pet

Tetusi pakat ganista
Konang bau nyampe pio
Kuning nas no bilen tana

Kuning kemang nas dalam pe
Na sampina nonda jangi
Jodohku ada pang andi

Beling suara leng langit
Kuarap sia ngo aku
Lampa sengo guntir mole

Lagi sengo guntir mole
Kapo tenri ai mata
Goyo nejamo kapendi

Na pendi lamin sakendi
Na sayang lamin sayate
Ate rusak parana do

Mana do kiri do kanan
Lamin surat ada jangi
Pamada untung batari

Batari andi batari
Ta kulalo tuntut ilmu
Belo umirku molesi

Balabu bangka kuandi
Let rea nan dadi saksi
Yatimal untung baketong

Lamin untung sama ketong
Senap mara katumaning
Kurelasi lanting kalong

Nomonda sama nan maras
Dengan kabasai ate
Do desa kusalam doa

Salam doaku ko andi
Nabuya batang parana
Tama surat lili tubu

Sakit tucinta do tokal
Sakit tubau batemung
Ada surat nonda jodo

Sai tulalo ko bima
Bilin kalong dalam ai
Tau balong jari nyai

Balangan siti fatimah
Ngantang ning lawang surga
Panto ancir batang tubu

Dapatmo kota Taliwang
Ada telu berang ngadang
Nonda bujaku no manang

Kele telu berang ngadang
Lamin balongsi kateman
Taliwang tau parama

Kele ning tau parama
Na coba lo buya beda
Pola sipat macan tunu

Coba gita macan tunu
Namo loba lalo garu
Angkat regam buya timal

Ala e anak taliwang
Kasar seda alis ate
Gaulmo cara mabalong

Tidak ada komentar: