LAWAS

Maris Gama Saling Pendi
Mara Tima Ketong Tali
Kalebu Tusaling Gayong

Marengung Rengit Leng Jawa
Kutosi Tanjung Tarepa
Goyo Galap Karante Nan

Ngibar Pio Kalis Empang
Bawa Tele Dua Kodeng
Yabuya Pang Basangaram

Ta Nya Korong Kamo Dadi
Tele No Kubeang Tama
Baeng Tele Kukamata


Parana Andi Jam Tangan
Aku Dadi Jarum Panjang
Saruntung Detik Panotang

Mana Desa Rabalat Olat
Lamin Jangi Kendung Rela
No Gampang Badua Pikir

Sabenar Nonda Koasa
Konang Kapasuru Ate
Mana Leng Sakit Kukaya

Lamin Tutu Siya Tutu
Satutu Gama Leng Tutu
Maris Tutu Lema Tutu

Lagi Kayu Katupasuk
Kapo Sakit Tubau Mat
Goyo Ate Kabaketong

Odesi Bangka Yamomat
Konang Momat Sarang Burung
Sakendi Konang Kawansi

Parana Andi Bungkus Te
Aku Dadi Gula Puti
Leng Gelas Sopo Tuancir

LAWAS

Nabi Masi Dalam Tian
Enam Bulan Lebe Kurang
Abdullah Bilen Donia

Salam Doa Ku Ko Sia
Rajin Gama Beribadat
Lema Tudapat Salamat

Kubalangan Lulir Tampar
Mataku Noroa Pendam
Nulang Lako Desa Darat

Ala E Mana Kupendi
Kubada Rara Kaku
Kena Sia Nesal Ngining

Puji Dirisi Lalayang
Ntek Ko Bao Kati Awan
Turin Ko Tana Buyangsi

Jangi Kami Tusalaki
Tuarap Reda Kasuka
Mana No Ujan Ke Guntir

Luk Mulia Desa Surga
Pakeang Intan Bulaeng
Saragi Rupa Kabalong

Kabatulan Leng Ano Len
Pang Bale Kau Kusepan
Sadia Jamu Tamue

Boemo Kadengan Sia
Ada Niat Ku Ano Ta
Sate Kujamu Tamue

Kutokal Rep Anorawi
Pikirku Ajanmo Selam
Luk kenras Kuangan Sia

LAWAS
Parakmo Yatama Desa
Ada Pandeta Nasrani
Kaleng Do Mo Yapanto

Saipo Rua Tau To
Ada Mega Tamo Payung
Me Ojok Kena Turitsi

Kabatulan Leng Ano Nan
Pang Bale Tau Repan
Sadia Jamu Tamue

Leng Luar Desa Dita Nan
Barenang Satoar Sio
Karasa Ompa Balangan

Benru Gita Leng Pandeta
Tau Ngantung Turin Boko
Basuru Lalo Pasila

Tama Ko Bale Diri Nan
Muhammad Bilen Ntok Barang
Pandeta To Bakatoan

Boemo Kadengan Sia
Ada Niat Ko Ano Ta
Sate Kujamu Tamue

Kalengmo Nyamung Maesarah
Adasi Masi Satau
Kami Suru Jaga Barang

Muhammad Datang Lako Nan
Tama Ko Bale Diri Nan
Tokal Basai Ke Dengan

Benru Tamamo Diri Nan
Pandeta Nganga Taria
Mangketuk Ate No Nyata

Karing Mo Samilin Mata
Kales Poto Bulu Mata
Santeris Jangka Poto Ne

Muntu Soe Korok Lamung
Nempasmo Gita Leng Mata
Tangkela Selak Balikat

Puti Rapang Sarang Bulan
Singin Kataman Nubulah
Tanda Nabi Akhir Saman






LAWAS

Nabi Lahir Ko Donia
Nongka Gita Rua Bapa
Lahir Singin Anak Yatim

Tamo Tutir Nabi Kita
Tusamula Karante Ta
Kaleng Mula Yaparanak

Nabi Masi Dalam Tian
Enam Bulan Lebe Kurang
Abdullah Bilen Donia

Abdullah Nan Singen Bapa
Katurunan Kaum Kurais
Anak Ne Abdul Muthalib

Bila We Nanta Pio Nan
Tarepa Kayu Nonda Den
Bagian Aku Ruana

Kakuojongsi Parana
Tiris No Kubeang Basa
Ujan Tampear Kukeme

Sarea Sia Si Lagina
Lako Tusanjele Arap
Lamin No Sia Saipo

Tengamo Petang Gila E
Nyenyarmo Anak Pioko
Luk Sopo Jangi Ke Aku



LAWAS

Dua Pulu Pitu Rajab
Yakelek Nabi Ko Langit
Trima Parenta Sembayang

Nosoda Sama Nan Maras
Tusaling Gayong Kanyaman
Pasasenap Desa Darat

O Sarea Tu Kanapat
Ingat Bau Sala Kakan
Siong Rasa Dalam Pikir

Bua Kusamanta Sumping
Nampir Nan Sasir Desa Ta
Kulayar Mana Kurugi

Sarea Siasi Lagina
Lako Tusanyele Arap
Lamin No Sia Saipo

Intanku Leng Atas Otak
Kubonga No Kukamilin
Aku Kutari Pamendi

Ala Mana Panas Tian
Karing Kubadampi Tokal
Caya Sia Nan Lili Me

LAWAS GURU PANGETO

Sai Sate Nyaman Ate
Laga Baguru Pangeto
Kalalo Nyawa Menansi

Ngibar Pio Lis Matano
Tarepa Puncak Sakola
Pio Baguru Pangeto

Mupikir Balong Ke Ate
Palajar Bada Leng Guru
Mumenong Rena Mupaham

Ingat Ke Balong Mupaham
Palajar Bada Leng Guru
Nanpo Roa Bakalako

Paham Kurang No Baguru
Ramenong Nonda Leng Ate
Me Po Tanang Yatudapat

Kalenge Kurang Baguru
Nomonda Dapat Palajar
Goyo Takit Kayaada

Sepan Diri Ulin Takit
Pamelang Rena Yaboat
Kateman Ulin No Nyadu

Boat Mana Mukasakit
Sarea Jenis Pasuru
Lema Senang Pang Akherat

Bendru Parakmo Ke Ajal
Sakitmo Boat Ibadat
Nanpo Masa Sesal Diri

Nesal Nomonda Kalako
Siong Nongka Tusatotang
Panyadu Kurang Pang Ate

Bendru Nomonda Salamat
Asimo Diri Parana
Nangis Rena Sesal Diri

Bendru Masamo Tudapat
Nanpo Masa Yatunesal
Parana Roa Kasakit

LAWAS ASMARA

Sakit Yakutengke Tingi
Mara Kuladang Let Rea
Saling Sewal Ke Kasakit

Sakit Lampa Nonda Ina
Tumara Rembin Kaseang
Kudadi Mega Kungantung

Kaseang Gama We Rembin
Langan Ku No Kuroa Sia
Roa Ke Notang Maraku

Ajan Sagita Panotang
Awal Mara Ujan Subu
Sampina Putis Sadino

Benru Kutotangmo Sia
Me Pio Beling Kusamung
Kenang Kusaliper Ate

Lili Kupendi Nanta Te
Lo Sayang Pio Lempat Let
Bau Lalo No Ramalik

Kema Yakuasa Mole
Siong Tulalo Badagang
Tupenri Desa Nantana

Siong Do Desa Tenrang Pang
Bakane Nomo Tutotang
Noroa Lampa Biasa

Kabiasa Ku Ke Sia
Nonda Sangano Kugita
Tangkas Sabulan Rarate

Musabar Kau We Ate
Na Beang Dua Pamikir
Lema No Barumang Susa

LAWAS

Ado Nomo Aku Mangan
Lamin Jangan Terong Cangi
Terong Kalatik Kutunung

Ado Nomo Aku Angan
Lamin Surat Nonda Jangi
Tusaling Katipo Dunung

Kosong Mara Pingan Tajo
Sangangkang Mate Ne Peno
Lalo Noto Ila Dengan

Puti Kuning Sempu Sai
Ateku Nosong Kalembu
No Untung Nyawaku Lalo

Sawai Kau Baesi
Kener Diri Mara Layang
To Lako Anjung Rasate

Lamin Bosan Babosanmo
Jina Tanang Tusamanta
Leng No Kau Tupujisi

Malang Gili Ke Aku Ta
Sangka Mubanta Karante
Odesi Konang Tutu Ling

Tanya Ketong Kusadia
Lamin Jangkeringmu Mape
Dikinmu Tokal Basungu

Kau Menir Kota Intan
Aku Mawar Leng Jambangan
Basai Mampis Gamana

Salam Doa Manmo Arap
Sudamo Kuasa Kau
Haram Pikirku Lako Len

Renas Angin Bawa Benrang
Kaseyang Rimpi Punti Sang
Kamanis Nagama Pakat

LAWAS

Leng Tenga Let Do Ke Sisi
Dengan Kumikir Nosoda
Dadi Ngasi Maraku

Siong Ngasi Dalam Bale
Aku Leng Padak Jenring Let
Nangis Ate Pendi Jangi

Bua Kudatang Lako Ta
Siong Kudatang Batimal
Kudatang Sarame Sia

Lamin Masamo Baseka
Adasi Tanda Mugita
Bulan Ke Ano Kapangan

Tingka No Putis Kuangan
Nomo Rampak Salam Doa
Ke Dengan Kabiasa

Kau Menir Kota Intan
Aku Mawar Leng Jambangan
Basa Mampis Gamana

Ada Gama Yakutumpan
Tubasipat Lene Uda
No Manis Senap Me Lako

Nanta Nasibku Aku Ta
Kakutanam Kemang Cinta
Leng Dalam Kemban Asmara

Muntu Kemangmo Yamekar
Yasumpingmo Leng Tau Len
Karing Karante Kutotang

Salaki Sia Baesi
Antin Diri Mara Anar
Nosoda Tau No Rempak

Pitu Ten Kujonyong Pengkit
Kayu Kaloka Matemo
Kamo Munyuk Beling No

Belo Umirku Gamana
Kubau Datang Kabali
Ko Desa Tualis Ate

LAWAS Asyik (Uci W.)

Manmo Tampir Kenre Berek
Nosi Mungkin Yakueneng
Mana Sapolak Kasesa

Manmo Pikir Lako Cobek
Nosi Mungkin Bau Jomeng
Mana Ulak Toar Basa

Nanta Gili Nonda Ai
Ngaronok Kuku Ke Kolo
Nan Pang Tunung Melasakan

Reketku Ta Reket Atom
No Kubeang Ayong Tu Len
Kusengel Dobel Ke Sia

Puti Me Mara Bulan
Kutelan Mara Garesik
Sakit Lampa Do Ke Sia

Ka Ling Manis Sia Ina
Yakutedung Mara Payung
Dadi Rep Ate Balangan

Mapanto Ate Nonda Su
Jarening Mara’i Siep
Me Tu Gayong Nosi Bosan

Kapal Kaola Kudatang
Balabu Tana Samawa
Na Tulang Pendi Gamana

Gila We Parana Kaku
Manra Rebu Turin Tawer
Ijosi Konang Rarate

Karante Sopo Karante
Tuikal Rena Tuonar
Mana Lona Saling Pendi

Long Lampayan Ke Aku Ta
Jina Mupakendek Lalo
Na Menan Sama Tulajang

LAWAS Sual Asyik

Benru Kutama Desa Ta
Taria Ngantang Samangat
Ate Nonda Sate Mole

Kamoyada Sate Mole
Ada Kemang Karasate
Rela Ke Ajan Kusumping

Bai Ode Leng Kangadu
Baka Ke Lalo Sembayang
Kokar Pet Penomo Mada

Adi Ode Karang Padu
Baka Ke Tangko Panyayang
Nongka Dapat Ngaro Bada

Ada Intan Kusamodeng
Kusangisi Kotak Mesir
Yatimal Umak Rampek Ban

Putimo Umak Rampek Ban
Na Pina Jenrang We Ate
Sarapang Bangka Parana

Kutulang Matamu Andi
Sendri Mara Bunga Eja
Senap Semu Mata Nulang

Bunga Eja Ning Makasar
Godong Dua Merah Puti
Bakemang Dadi Wanita

Bua Kudatang Lako Ta
Rungan Yandi Manis Tawa
Ning Sopo Sipat Ke Aku

Kaling Dunung Karasate
Nopoda Katenganku Aku
Kususa Na Kena Beling No



LAWAS Sedih

Sakit Lampa Do Ke Ina
Manra Kebo Do Ke Kuang
Mangansi Konang Rarate

Ina Lalo Langan Jaran
Kututit Ka No Kudapat
Jempang Baemo Kutangis

Sosong Lalo Ai Mata
Kuosap Sajan Karempan
No To Tegas Nonda Jangi

Melasakan Nanta Rara
Ngining Sabelo Rep Kayu
Tenri Adal Asi Niri

Ina Nyaman Dalam Tana
Panjele Ban Ta Kurapat
Anak Ngining Pang Donia

Bola Tu No Asi Niri
Lamin Mara Jangi Kaku
Salingong Lewat Tupeno

Ngibarmo Pio Salati
Seyap Tu Pang Santo Ano
Tutit Sama Balong Sipat

Yakananta Tu Taliwang
Mara Lumit Ketong Batu
Tu Ngaro Suka Ko Sia

Siamo Tunyaman Ate
Panjele Kota Merdeka
Bonga Tiang Rop Ke Layar

Kamentu Nan Tear Seran
Kasoro Benteng Barinas
Ning Desa Sampir Pang Ada


Lawas Asyik

Bunga Eja Sideng Bale
Pitu Ten Tiup Leng Angin
Kane No Sia No Gugir

Lamin Turinmo Pamendi
Na Gama Sapolak Ngano
Sampe Umirku Gamana

Laminku Domo Ke Andi
Sempit Aku Salam Doa
Lema Kumasi ..... Ada

Maketong Intan Maketong
Santung Leng Parana Dita
Noya Rela Yakubosan

Jangi Telat Kubalayar
Malang Takat Boa Lombok
Urung Balabu Uang Dinar

Mana Pitu Bangka Tama
Lamin Nonda Bangka Sia
Balong Kungantang Batari

Lagi Rembu Gusung Rea
Kapo Arap Diri Belo
Goyo Aku Ketong Sia

Leng Tenga Let Layar Jangi
Yakukenang Tampir Untung
Tusaling Batin Panotang

Leng Bao Anar Kungoleng
Ling Boa Lawang Kuangkang
Kutari Turin Pamendi

Ngawang Mara Darapati
Saminmo Panulang Mata
Ku Do Tokalmo Ke Andi

Lawas Asyik

Benru Dapat Onrong Tenga
Peno Mekam Kembo Nalu
Kembo Nara Boe Mate

Benru Dapat Ruang Tenga
Peno Tokal Tau Balu
Tudadara Lako Ate

Benru Kutampong Baringin
Tenri Duri Ko Tana Ta
Nasa Roro Dana Tenrang

Benru Kutotangmo Singin
Tenri Diri Ai Mata
Tu Kaolo Dana Tenrang

Benru Dapat Tana Tingi
Ngaro Gama Balik Bungkak
Lema Tugita Kalampa Ne

Kejar Ilmu We Kaka E
Lako Puncak Olat Biru
Jasa Guru Na Kalupa

Mana Kutama Luang Dalap
Lamin Langan Rea Kau
Sangsara Mayit Kudapo

Sai No Kamoan Datang
Lamin Turame Mara Ta
Jarang Tumole No Notang

Ngeneng Ampin Sate Koat
Kamerat Leng Kena Nat
O.. I Am Sory, You Death...